ಸುದ್ದಿ ಕೇಳಿದವರಿಗೆ ಈಗ ನಿಜವಾಗ್ಲು ಶುಗರ್ ಬಂದಿರುತ್ತೆ: ಸೋಮಶೇಖರ್ ರೆಡ್ಡಿ

ಎಸ್ ಟಿ & ಎಸ್ಸಿ ಮೀಸಲಾತಿ ಹೆಚ್ಚಳ ಸಂಭ್ರಮಾಚರಣೆ ವೇಳೆ ಹಾಜರಿದ್ದು ಮಾತನಾಡಿದ ಬಳ್ಳಾರಿ ನಗರ ಶಾಸಕ ಜಿ.ಸೋಮಶೇಖರರೆಡ್ಡಿ; ನಾನು ಶ್ರೀರಾಮುಲುನನ್ನು ಮೂವತ್ತು ವರ್ಷಗಳಿಂದ ನೋಡುತ್ತಿದ್ದೇವೆ, ಮಾತು ಕೊಟ್ಟರೆ ಮಾತು ತಪ್ಪೊನಲ್ಲ, ಯಾವನೋ ಅವನು ಏನೇನೋ ಹೇಳ್ತಾ ಇದ್ದ, ಕೆಲವರು ಏನು ಸಿಹಿ ಸುದ್ದಿ? ನಮಗೆ ಶುಗರ್ ಬರುತ್ತಿದೆ ಎಂದಿದ್ದ ಒಬ್ಬ, ಇವತ್ತು ನಿಮಗೆ ನಿಜವಾಗಲೂ ಶುಗರ್ ಬಂದಿರುತ್ತದೆ ಎಂದು ಹೆಸರು ಹೇಳದೆ ಬಳ್ಳಾರಿ ಗ್ರಾಮೀಣ ಶಾಸಕ ನಾಗೇಂದ್ರ ಅವರನ್ನು ಕುಟುಕಿದರು.

ಶ್ರೀರಾಮುಲು ಕರ್ನಾಟಕದ ಹುಲಿ, ಗಂಡುಗಲಿ, ನಾಯಕ ಅಲ್ಲ, ನುಡಿದಂತೆ ನಡೆದ ಒಬ್ಬ ಮಹಾನಾಯಕ, ಇಂದು ವಾಲ್ಮೀಕಿ ಜಯಂತಿ ಇದೆ, ಜಯಂತಿಗೆ ಮೊದಲೇ ಎಸ್ಟಿ ಸಮುದಾಯಕ್ಕೆ ಶೇ.4 ರಷ್ಟು ಮೀಸಲಾತಿ ಜಾಸ್ತಿ ಮಾಡಿಯೇ ಬಳ್ಳಾರಿಗೆ ಬರುತ್ತೇನೆ ಎಂದು ನನ್ನ ಮುಂದೆ ಹೇಳಿದ್ದರು, ಮೀಸಲಾತಿ ಹೆಚ್ಚು ಮಾಡಿದರು, ಕೇವಲ ಎಸ್ಟಿ ಸಮುದಾಯಕ್ಕೆ ಮಾತ್ರವಲ್ಲ, ಎಸ್ಸಿ ಸಮುದಾಯಕ್ಕೂ ಶೇ.2 ಮೀಸಲಾತಿ ಹೆಚ್ಚು ಮಾಡಿದ್ದಾರೆ, ಅದೇ ಕಾರಣಕ್ಕೆ ನಾವಿಂದು ಒಬ್ಬ ದೇಶದ ನಾಯಕನನ್ನು ಬರಮಾಡಿಕೊಂಡಂತೆ ಬರಮಾಡಿಕೊಂಡಿದ್ದೇವೆ ಎಂದು ಬಳ್ಳಾರಿ ನಗರ ಶಾಸಕ ಜಿ.ಸೋಮಶೇಖರರೆಡ್ಡಿ ಹೇಳಿದರು. ನಿಮ್ಮೆಲ್ಲರ ಆಶೀರ್ವಾದದಿಂದ ಶ್ರೀರಾಮುಲು ಗಲ್ಲಿಯಿಂದ ಡೆಲ್ಲಿವರೆಗೆ ಮನೆ ಮಾತಾಗಿದ್ದಾನೆ, ನೀವು ಎಷ್ಟು ಪ್ರೀತಿ, ಉತ್ಸಾಹ ತೋರಿಸಿದ್ದೀರೆಂದರೆ ನಿಮ್ಮ ಋಣ ತೀರಿಸಲು ನಾವು ಇನ್ನೊಂದು ಜನ್ಮ ಹುಟ್ಟಿ ಬರಬೇಕು ಎಂದು ಹೇಳಿದ ಶಾಸಕ ಸೋಮಶೇಖರರೆಡ್ಡಿ, ವಿಜಯದಶಮಿ ದಿನ ರಾಮ ರಾವಣನಿಗೆ ಒಂದು ಬಾಣ ಹಾಕಿದ, ರಾವಣ ಸುಟ್ಟು ಹೋದ, ಈಗ ನೆಕ್ಸ್ಟ್ ಯಾರಿಗೆ ಬಾಣ ಹಾಕೋದು? ಕಾಂಗ್ರೆಸ್ ಗೆ ಬಾಣ ಹಾಕೋದು, ಬಾಣ ಹಾಕಿದರೆ ಕಾಂಗ್ರೆಸ್ ಫಿನಿಶ್ ಎಂದು ವ್ಯಂಗ್ಯವಾಡಿದರು.
 ಶ್ರೀರಾಮುಲು ಒಂದು ಬಡ ಕುಟುಂಬದಲ್ಲಿ ಹುಟ್ಟಿ ಈ ಮಟ್ಟಕ್ಕೆ ಬೆಳೆದಿದ್ದರೆ ಅದು ಜನರ ಆಶೀರ್ವಾದ, ಶ್ರೀರಾಮುಲು ಮುಖದಲ್ಲಿ ದೇವ ಕಳೆ ಇದೆ, ಪ್ರಧಾನಿಯವರಿಗೆ ದೇವಶಕ್ತಿ ಇರುವಂತೆ ಶ್ರೀರಾಮುಲುಗೂ ದೇವ ಶಕ್ತಿ ಇದೆ ಎಂದು ಹೇಳಿದ ಶಾಸಕ ಸೋಮಶೇಖರರೆಡ್ಡಿ, ಯಾರ ಕೈಲೂ ಆಗಲ್ಲ, ಒಂದು ಪರ್ಸೆಂಟ್ ಮೀಸಲಾತಿ ಹೆಚ್ಚು ಮಾಡೋದು, ನಾನೂ ಕೂಡ ಅಂದುಕೊಂಡಿರಲಿಲ್ಲ, ಒಂದೆರಡು ಪರ್ಸೆಂಟ್ ಮೀಸಲಾತಿ ಹೆಚ್ಚಾಗಬಹುದು ಎಂದುಕೊಂಡಿದ್ದೆ, ನಾಲ್ಕು ಪರ್ಸೆಂಟ್ ಮೀಸಲಾತಿಯನ್ನು ಶ್ರೀರಾಮುಲು ಜಾಸ್ತಿ ಮಾಡಿದ್ದಾರೆ, ಒಟ್ಟು 7 ಪರ್ಸೆಂಟ್ ಮೀಸಲಾತಿ ಆಗಿದೆ, ಇದರರ್ಥ ಶ್ರೀರಾಮುಲು ಏಳೇಳು ಜನ್ಮಗಳಿಗೂ ನಿಮ್ಮ ಜೊತೆ ಇರುತ್ತಾನೆ ಅಂತ ಅರ್ಥ ಎಂದು ಹೇಳಿದರು.

ಮಾಜಿ ಸಂಸದರಾದ ಜೆ.ಶಾಂತಾ, ಸಣ್ಣಫಕೀರಪ್ಪ, ಮಾಜಿ ಶಾಸಕ ಸುರೇಶಬಾಬು, ಬುಡಾ ಅಧ್ಯಕ್ಷ ಮಾರುತಿ ಪ್ರಸಾದ್, ಮಾಜಿ ಬುಡಾ ಅದ್ಯಕ್ಷ ಪಿ.ಪಾಲನ್ನ ಪಾಲಿಕೆ ಸದಸ್ಯರಾದ ಮೋತ್ಕರ್ ಶ್ರೀನಿವಾಸ್, ಗೋವಿಂದರಾಜುಲು ಸೇರಿದಂತೆ ಹಲವರು ಹಾಜರಿದ್ದರು.