ಕೌಲ್ ಬಜಾರ್ ನಲ್ಲಿ ಶ್ರೀರಾಮುಲು ಅಬ್ಬರ

ಬಳ್ಳಾರಿ: (ಜಾಗೃತಿ ಕಿರಣ ನ್ಯೂಸ್) ಮೇ 10 ರಂದು ನಡೆಯಲಿರುವ ವಿಧಾನಸಭೆ ಚುನಾವಣೆಗೆ ಬಳ್ಳಾರಿ ಗ್ರಾಮೀಣ ಕ್ಷೇತ್ರದಿಂದ ಬಿಜೆಪಿ ಅಭ್ಯರ್ಥಿಯಾಗಿ ಸ್ಪರ್ಧಿಸಿರುವ ಬಿ.ಶ್ರೀರಾಮುಲು ಅವರು ನಿನ್ನೆ ಸಂಜೆ ಕೌಲ್ ಬಜಾರ್ ವ್ಯಾಪ್ತಿಯಲ್ಲಿ ಅಬ್ಬರದ ಬೃಹತ್ ರೋಡ್ ಶೋ ನಡೆಸಿ, ಕ್ಷೇತ್ರದ ಹಾಲಿ ಶಾಸಕ ಕಾಂಗ್ರೆಸ್ ಅಭ್ಯರ್ಥಿ ಬಿ.ನಾಗೇಂದ್ರರ ವಿರುದ್ಧವಾಗಿ ಪರೋಕ್ಷ ವಾಗ್ದಾಳಿ ನಡೆಸಿದರು.

 
ಕ್ಷೇತ್ರದ ಶಾಸಕರ ಹೆಸರನ್ನು ಹೇಳಲಿಚ್ಛಿಸದೆಯೇ ಕಳೆದ 5 ವರ್ಷದ ಅವಧಿಯಲ್ಲಿ ದೂರ ಇದ್ದವರು ಇದೀಗ ಕಳೆದ ಒಂದು ವರ್ಷದಿಂದ ಕೌಲ್ ಬಜಾರಿನಲ್ಲಿ ಕಾಣಿಸಿಕೊಂಡಿದ್ದಾರೆ. ಚುನಾವಣೆ ಹತ್ತಿರ ಬಂದಾಗ ಮಾತ್ರ ತಮ್ಮ ಪ್ರೀತಿ ತೋರಿಸುತ್ತಾರೆ. ಮುಸ್ಲಿಂ ಬಾಂಧವರ ಪವಿತ್ರ ರಂಜಾನ್ ಹಾಗೂ ಬಕ್ರೀದ್ ಹಬ್ಬದ ಧಾರ್ಮಿಕ ಅಚರಣೆ ವೇಳೆ ಮುಸ್ಲಿಂ ಬಂಧುಗಳು ಸಂಪರ್ಕಿಸಿಲು ಯತ್ನಿಸಿದರೆ ಮೊಬೈಲ್ ಸ್ವಿಚ್ ಆಫ್ ಆಗಿರುತ್ತದೆ. ಬಿ.ಶ್ರೀರಾಮುಲು ಹಾಗಲ್ಲ. ಎಲ್ಲೇ ಇದ್ದರೂ ಕೌಲ್ ಬಜಾರ್ ಪ್ರದೇಶದ ಜನರನ್ನು ಮರೆತಿಲ್ಲ. ಕಾಂಗ್ರೆಸ್ ನವರು ಏನೇ ಗ್ಯಾರಂಟಿ ನೀಡಿದರೂ ನೀವ್ಯಾರು ನಂಬಬೇಡಿ. ಅವರು ಸುಳ್ಳು ಹೇಳುತ್ತಾರೆ. ನಾನು ಯಾವತ್ತಿಗೂ ನಿಮ್ಮ ಜೊತೆ ಇರುತ್ತೇನೆ ಎಂದು ಅಭಯ ನೀಡಿದರು. 

ಕೌಲ್ ಬಜಾರಿನ ಪೊಲೀಸ್ ಸ್ಟೇಷನ್ ನಿಂದ ಬಾಬು ಸರ್ಕಲ್ ವರೆಗೆ ಬೃಹತ್ ರೋಡ್ ಶೋ ನಡೆಸಿದ ಅವರು, ನೆರೆದ ಜನರನ್ನುದ್ದೇಶಿಸಿ ಭಾವನಾತ್ಮಕ ಭಾಷಣ ಮಾಡಿದ ವೇಳೆ ಕಾರ್ಯಕರ್ತರು ಪ್ರೇರಣೆಗೊಂಡು ಸಿಳ್ಳೆ, ಕೇಕೆ ಹಾಕುತ್ತಿರುವ ದೃಶ್ಯ ಸಾಮಾನ್ಯವಾಗಿತ್ತು. ನಡು ನಡುವೆ ಮೈಕ್ ಕೈ ಕೊಟ್ಟಾಗ ಅಭಿಮಾನಿಗಳ ಒತ್ತಾಸೆ ಮೇರೆಗೆ ಮೈಕ್ ಬದಲಾಯಿಸಿ, ಮತ್ತೆ ಭಾಷಣ ಮುಂದುವರಿಸಿದರು. ಶ್ರೀರಾಮುಲು ನಿಮ್ಮೊಂದಿಗೆ ಇದ್ದಾನೆ. ನೀವು ಯಾರಿಗೂ ಭಯ ಬೀಳಬೇಕಾದ ಅಗತ್ಯವಿಲ್ಲ. ಶೇ 4% ಮೀಸಲಾತಿಗಾಗಿ ನಾನು ಹೋರಾಟ ಮುಂದುವರಿಸುತ್ತೇನೆ. ನಾನೆಂದಿಗೂ ಐಕ್ಯತೆ ಮತ್ತು ಸಹೋದರತೆ ಭಾವದವನು. ಕೌಲ್ ಬಜಾರಿನ 40ಕ್ಕೂ ಹೆಚ್ಚು ಮಸೀದಿಗಳ ದುರಸ್ಥಿ ಮಾಡಿಸಿದ್ದೇನೆ. ಹಂಪಿ ಸೇರಿದಂತೆ ಕೋಟೆ ಮಲ್ಲೇಶ್ವರಸ್ವಾಮಿ ಮತ್ತು ಚರ್ಚ್‍ಗಳನ್ನು ಸಹ ಅಭಿವೃದ್ಧಿ ಪಡಿಸಿದ್ದೇನೆ. ಉಕ್ರೇನ್ ಮತ್ತು ರಷ್ಯಾ ನಡುವೆ ಯುದ್ಧ ನಡೆದಾಗ ನಮ್ಮೂರಿನ ಎಲ್ಲ ಯುವಕರನ್ನು ಸುರಕ್ಷಿತವಾಗಿ ಕರೆ ತಂದಿದ್ದೇನೆ. ಮೋದಿ ಅವರ ಮೂಲಕ ಬಳ್ಳಾರಿ ಜನರನ್ನು ಸುರಕ್ಷಿತವಾಗಿ ತಲುಪಿಸುವ ಗುರುತರವಾದ ಜವಾಬ್ದಾರಿ ವಹಿಸಿದ್ದೇನೆ. ಆ ಸಮಯದಲ್ಲಿ ಕಾಂಗ್ರೆಸ್ ನವರು ಎಲ್ಲಿ ಹೋಗಿದ್ದರು? ಹೀಗಾಗಿ, ನೀವು ಕಾಂಗ್ರೆಸ್ ಜನರನ್ನು ನಂಬ ಬೇಡಿ. ಅವರು ಸುಳ್ಳು ಹೇಳುತ್ತಾರೆ. ಈದ್ಗಾದ ಪ್ರಾರ್ಥನಾ ಸ್ಥಳಕ್ಕೆ ಕೋಟ್ಯಾಂತರ ರೂ. ಮೌಲ್ಯದ 4 ಎಕರೆ ಜಮೀನು ಒದಗಿಸಿದ್ದೇನೆ. ಇನ್ನಷ್ಟು ಸೌಲಭ್ಯಗಳನ್ನು ಒದಿಗಿಸುವ ಇಚ್ಛೆ ಇದೆ. ಬಿಜೆಪಿಗೆ ಮತ್ತೊಂದು ಬಾರಿ ಬೆಂಬಲಿಸುವ ಮೂಲಕ ನನ್ನನ್ನು ಗೆಲ್ಲಿಸಿಕೊಡಿ ಎಂದು ಕೌಲ್ ಬಜಾರ್ ಜನರಿಗೆ ಶ್ರೀರಾಮುಲು ಮನವಿ ಮಾಡಿದರು.